с

Монгол, Хятадын хилийн Замын-Үүд-Эрээн авто замын боомтын зорчигч тээврийн хөдөлгөөнийг 2023 оны 01 дүгээр сарын 08-ны өдрөөс сэргээж буйтай холбогдуулан Монгол Улсаас БНХАУ-д суугаа ДТГ-ууд, Хууль зүй дотоодын хэргийн яам, Зам тээврийн хөгжлийн яам, Эрүүл мэндийн яам, Хил хамгаалах ерөнхий газар, Гаалийн ерөнхий газар, Гадаадын иргэн харьяатын газар, Боомтын сэргэлтийн үндэсний хорооны ажлын алба, Хилийн боомтын захиргаа, Дорноговь аймгийн ЗДТГ, Замын-Үүд сумын ЗДТГ, Авто тээврийн үндэсний төв зэрэг холбогдох байгууллагын ажил хариуцсан албан тушаалтнууд оролцсон цахим уулзалтыг 2023 оны 01 дүгээр сарын 04-ны өдрийн 11.00 цагт Гадаад харилцааны яаманд зохион байгуулав.

Цахим уулзалтыг Гадаад харилцааны яамны Төрийн нарийн бичгийн дарга Н.Анхбаяр ахалж, Замын-Үүд-Эрээн авто замын боомтын зорчигч нэвтрүүлэх үйл ажиллагааг сэргээх чиглэлээр дипломат шугамаар ажиллаж буй нөхцөл байдлыг танилцуулж, Монгол Улсаас БНХАУ-д суугаа ЭСЯ, Хөххот дахь ЕКГ, Эрээн дэх КГ болон Манжуур дахь КГ-ын дипломат ажилтнууд Монгол, Хятадын хилийн боомтуудын зорчигч тээврийн хөдөлгөөнийг сэргээх чиглэлээр авч хэрэгжүүлж буй арга хэмжээ, хятадын талын байр суурь, төлөвлөгөөний талаар цаг үеийн асуудлаар дэлгэрэнгүй мэдээлэл хийв.

Уулзалтын үеэр хилийн хяналт шалгалтын байгууллагууд Замын-Үүд-Эрээн авто замын боомтоор зорчигчдыг хил нэвтрүүлэх үйл ажиллагаанд онцгой анхаарч, хятадын талтай орон нутгийн түвшинд идэвхтэй хамтран ажиллах замаар хилийн боомтоор зорчигч нэвтрүүлэх үйл ажиллагааг цэгцтэй, түргэн шуурхай, олон нийтэд чирэгдэлгүй, ойлгомжтой байдлаар зохион байгуулах чиглэлээр идэвхтэй ажиллахаар болов.

Энэ хүрээнд Гадаад харилцааны яамнаас 2023 оны 01 дүгээр сарын 04-ний өдрийн 14.00 цагт Монгол, Хятадын хилийн Замын-Үүд-Эрээн авто замын боомтын зорчигч тээврийн хөдөлгөөнийг эхлүүлэх, иргэд харилцан зорчих нөхцөл, хил нэвтрэхэд анхаарах асуудлын талаар хэвлэлийн хурал зарласан байна.

Мэдээллийн эх сурвалж: https://mfa.gov.mn/71685