ГАШУУНСУХАЙТ-ГАНЦМОД БООМТООР IV/23-НААС НҮҮРС ТЭЭВРИЙН 300 ОРЧИМ АВТОМАШИН ӨДӨРТ ГАРЧ ЭХЛЭВ

Дөрөвдүгээр сарын 23-наас эхлэн Гашуунсухайт-Ганцмод боомтоор өдөрт нүүрс тээврийн 300 гаруй автомашин гарч эхэлснийг боомтын удирдлага мэдээллээ.

БНХАУ-д нүүрсний олборлолт буурч, цар тахлын нөхцөл байдал хүндрээд байна. Үүнтэй холбоотойгоор БНХАУ-ын тал Монголоос татан авалтаа нэмэгдүүлэх сонирхолтой байгаагаа илэрхийлж байсан юм.

Дөрөвдүгээр сарын нэгнээс Гашуунсухайт боомтоор өдөрт нэвтрэх нүүрс тээврийн автомашины тоог 300 болгохоор тохиролцсон ч БНХАУ-д COVID-19-ийн халдварын тархалт буурахгүй байгаатай холбоотойгоор хэрэгжих боломжгүй байв.

Харин өнгөрсөн амралтын өдрүүдэд өдөрт 300 гаруй автомашин гарч эхэлсэн байна. Цаашид БНХАУ-д COVID-19-ийн халдварын тархалт хумигдвал үүнээс ч нэмэгдүүлэх боломжтой ажээ.

Он гарсаар дөрөвдүгээр сарын 21-ний өдөр хүртэлх хугацаанд Монгол Улс 3.3 сая тонн нүүрс экспортлоод байна. Гуравдугаар сарын дунд үеэс хойш нүүрсний тээвэр бага зэрэг нэмэгдэж эхэлсэн ч хангалтгүй байгаа юм.

Үүнээс гадна өнгөрсөн оны аравдугаар сараас хойш хаалттай байгаа Шивээхүрэн боомтын үйл ажиллагааг энэ сард багтааж нээх талаар Засгийн газар мэдээлээд байна. Эхний ээлжид боомтод хуримтлагдсан долоон сая гаруй тонн нүүрсийг гаргахаар ажиллаж байгаа аж.

Мэдээллийн эх сурвалж: https://bloombergtv.mn/