Монгол Улсын Хилийн боомтын захиргаа болон Бүгд Найрамдах Хятад Ард Улсын Өвөр Монголын Өөртөө Засах Орны Боомтын захиргааны алба хоорондын хамтын ажиллагааны ажлын хэсгийн I улирлын хурал

Монгол Улсын Хилийн боомтын захиргаа болон Бүгд Найрамдах Хятад Ард Улсын Өвөр Монголын Өөртөө Засах Орны Боомтын захиргааны алба хоорондын хамтын ажиллагааны ажлын хэсгийн I улирлын хурлыг 2025 оны 02 дугаар сарын 27-ны өдөр Бүгд Найрамдах Хятад Ард Улсын Өвөр Монголын Өөртөө Засах Орны Хөлөнбуйр хотын Шинэ Барга Баруун хошуунд зохион байгууллаа. Монголын талын төлөөлөгчдийг Монгол Улсын Хилийн боомтын захиргааны дарга бөгөөд Засгийн газрын бүрэн эрхт төлөөлөгч Б.Батхишиг, хятадын талын төлөөлөгчдийг Бүгд Найрамдах Хятад Ард Улсын Өвөр Монголын Өөртөө Засах Орны Худалдааны танхимын дэд дарга, Боомтын захиргааны албаны дарга Лю Юунмин тус тус тэргүүлэн оролцов.

Тус хурлаар талууд 2024 оны II, III улирлын ажлын хэсгийн хурлаар хэлэлцэн тохирсон ажлын хэрэгжилт болон хүрсэн үр дүнг өндрөөр үнэлж, үргэлжлүүлэн боомтын дэд бүтцийн бүтээн байгуулалтыг улам сайжруулж, зорчигч болон ачаа тээврийн гарцыг тусад нь байгуулж, боомтын нэвтрүүлэх хүчин чадлыг дээшлүүлэх, олон төрөлт тээврийн хэрэгсэл(AGV, 5G)-ийг нэвтрүүлэх чиглэлээр хамтын ажиллагааг хөгжүүлж ажиллахаа илэрхийлэв.

Хамтын ажиллагааны Ажлын хэсгийн 2025 оны I улирлын хурлаар монголын талын 13, хятадын талын 7 буюу нийт 20 асуудлаар хэлэлцэж, протоколд тусгав. Энэ удаагийн хурлаар зарчмын хувьд саналын зөрүүтэй асуудлууд гараагүй бөгөөд талуудын дэвшүүлсэн саналуудыг найрсаг байдлаар хүлээн авч, тохиролцов.