Тээврийн жолооч нарыг эрүүл мэндийн үзлэг, шинжилгээнд хамруулав
Монгол Улсаас БНХАУ-ын ӨМӨЗО-ы Хөххотод суугаа Ерөнхий консулын газар энэ оны 2-р сард БНХАУ-ын ӨМӨЗО-ы Баяннуур аймгийн Гадаад харилцааны газар, Ганцмод боомтын Захиргааны удирдлагуудтай хийсэн уулзалтаар нүүрс тээврийн Монгол Улсын жолооч нарт эрүүл мэндийн шинжилгээ, оношилгоо, туслалцаа үзүүлж байх хүсэлтийг тавьсан. Улмаар ӨМӨЗО-ын Баяннуур аймгийн зүгээс сар бүр нүүрс тээврийн жолооч нарт эрүүл мэндийн үзлэг, зөвлөгөө, тусламж үзүүлж байхаа илэрхийлж энэ оны 07 дугаар сарын 25-нд нүүрс тээврийн 300 орчим монгол жолоочид эрүүл мэндийн үнэгүй үзлэг, зөвлөгөө өгсөн. Энэ сарын эрүүл мэндийн үзлэгийн аяныг 08 дугаар сарын 29-нд хэрэгжүүлж нүүрс тээврийн 200 орчим жолоочид эрүүл мэндийн шинжилгээ, зөвлөгөөг өгөв. Монгол, Хятадын Гашуунсухайт-Ганцмод боомтод нүүрс тээврийн 5000 орчим монгол жолооч ажилладаг бөгөөд ӨМӨЗО-ы Баяннуур аймгийн Гадаад харилцаа, Баяннуур аймгийн Монгол эмнэлгийн хороо, Ганцмод боомтын Захиргаа энэ жилд 2000 орчимд монгол жолооч нарт эрүүл мэндийн туслалцаа үзүүлэхээр зорин ажиллаж байна